Ligo na U, Lapit na Me

Friends with benefits and perks. Katatapos ko lang panoorin ang pelikulang Friends with Benefits (2011) na pinagbidahan nila Justin Timberlake (Dylan) at Mila Kunis (Jamie)... Nakakaliw, nakakatuwa (nakatutuwa??) kung paano nila nabigyan buhay ang karanasan ng mga FUBU. Oo, Tama! Mga FU*k BUddies. Ganun daw kasi ang mababait at tunay na magkaibigan, nagpapahipo. Isa itong pelikulang tama din ang timpla, swak sa panlasa, may kiliti at ligayang panggising sa natutulog mong diwa. Sabihin na natin na nalibang din ako sa panonod ng pelikulang ito, pero ayun nga anticipated ko na naman ang dulo (and they lived happily ever after). Kung sabagay halos lahat naman ng pelikula ay ganyan...and they lived happily ever after. Hindi naman sa hindi ako naniniwala sa happily ever after o ayaw ko nito, ayaw ko lang na makapanood ng mga pelikulang predictable ang takbo ng kwento. Minsan pa nga mas natutuwa ako sa pelikulang hindi ko maintindihan. Yung tipo ng pelikula na mapapasambit ako na "Ah, ganun pla yun!". O kaya naman patay ang lahat ng tauhan sa dulo ng kwento. Morbid.

Sa panonood ko ng pelikulang Friends with Benefits (2011), hindi na ako na culture shock, nanibago o naasiwa sa kwento dahil naranasan ko na ito (patay tayo dyan!...ahahaha!) nabasa ko noon pa man ang obra ni Ginoong Eros Atalia na "Ligo na U, Lapit na Me".  Maganda ang pagkakabalanse ni Master Eros Atalia sa kanyang nobela.  Para itong roller coaster na magpapanatili sa gising mong diwa upang namnamin ang bawat eksena na iyong kinapapanabikan masundan. Unpredictable. Kailangan mo ng magtanong. Sabi nga nya sa nobelang ito:

Paano mo malalaman kung hindi ka magtatanong? Pero ang andami-dami nating nalalaman kahit hindi tayo nagtatanong. Paano ka pa magtatanong kung alam mo na ang sagot. Pero paano ka magtatanong kung hindi mo alam ang iyong itatanong? Paano mo sasaguting ang tanong sa iyo kung hindi mo alam ang isasagot? Paano ka sasagot kung hindi mo alam ang tanong. (Kunsabagay, sa buhay na ito, madalas, tama ang sagot, mali nga lang ang tanong.) 

---Eros Atalia

Nitong nakalipas na buwan, isina-pelikula na din ang nobelang ito sa parehong titulong "Ligo na U, Lapit na Me" bilang opisyal na lahok sa patimpalak ng Cinemalaya. Nakakatuwang isipin na nabigyan buhay na din ang nobelang ito sa pinilakang-tabing bagamat isa itong indie film.

Ang nasabing pelikula ay pinagbidahan nina Edgar Allan Guzman bilang Intoy at Mercedes Cabral bilang Jenny na batay din sa panulat ni Jerry Gracio, produksyon ni Noel Ferrer at direksyon ni Erick C. Salud.  Bagamat hindi nagwagi bilang Best Movie ang "Ligo na U, Lapit na Me", nakuha naman ni Edgar Allan Guzman ang karangalan "Best Performance of an Actor".  Narito ang kauting patikim mula sa pelikula.

Si Intoy, sa kauna-unahang pagkakataon, parang natuto na yatang magmahal pero hindi tiyak kung minahal ba sya o kinailangan. Sa kauna-unahang pagkakataon, parang Math problems, tama ang sagot, hindi nga lang maipakita ang solution....

Narito, ang isang nobelang may asim ng romansa, pait ng pagkabigo, tamis ng ligaya, alat ng pamumuna at anghang ng kaastigan. Handa ka na ba?

O talagang handa ka na ba?  Handa na din sana si Intoy na talikuran ang kanyang pagiging astig at ipagtapat kay Jenny ang kanyang nararamdaman sa kabila ng kanilang madalasang paglalaro ng apoy at napagkasunduan na hindi dapat mahulog ang loob nila sa isa't isa. Ang masaklap nabuntis si Jen. Ngunit mas masaklap, ang sabi ni Jen hindi daw ito sa kanya.