...Kapalaran Ayon sa Galaw ng Kalawakan (Ophiuchus)...

Nitong nakalipas na linggo, ginulatang tayong lahat ng isang nakakatakot na balita. Oo! Nakakatakot talaga. At ito ay ang pagsulpot ng Astrological Sign na kung tawagin ay "Ophiuchus". Ang totoo nyan hindi ko alam kung paano yan bigkasin. Kung kaya nga binibigkas ko lang yan katunog ng likidong lumalabas sa ilong sa wikang Ingles. Ophiuchus, Mucus, magkatunog. Kung silent "i" yan, yun ang hindi ko alam. Pero bakit nga ba nakakatakot? Simple lang, mantakin ba naman na sisingit yan sa ating nakasanayan na 12 zodiac o astrological signs. Ibig sabihin, magiging labingtatlo ng lahat yun. Ibig din sabihin, magbabago na din ang zodiac sign natin. Ibig sabihin, kung dating Cancer ka at ang ugali mo ay may pagka-moody, mag-iiba na yun at magiging kaugali mo na ang mga poging Gemini na tulad ko (self-proclaimed, bawal ang umangal). Ganito daw ang pagkakayos nun:

Pisces (March 13 - April 19)

Aries (April 20 - May 12)

Taurus (May 13 - June 20)

Gemini (June 21 - July 19)

Cancer (July 20 - August 11)

Leo (August 12 - September 17)

Virgo (Sepetember 18 - October 31)

Libra (November 1 - November 21)

Scorpius (November 22 - November30)

Ophiuchus (December 1 - December 18)

Sagittarius (December 19 - January 18)

Capricorn (January 19 - February 17)

Aquarius (February 18 - March 12)

Ang totoo nyan, matagal ng panahon ng banggitin ni Ptolemy ang Constellation Ophiuchus. Sa kanyang apatnapu't walong listahan ng konstelasyon kabilang dito ang Ophiuchus na kadalasan ay binabansagan ding "Serpentarius". Serpentarius, the serpent-bearer. Kung inyong mapapansin ang bawat Zodiac signs ay may katugmang Constellations o ang mga zodiac signs o astrological signs, o kung anu man ang tawag dyan ay ang mga constellation din mismo. Ang zodiac signs na ating alam sa kasalukuyan ay ayon sa paggalaw ng araw sa mga konstelasyon noon pang nakalipas na 2,500 na taon. At sa kadahilanang nagbabago na din ang paggalaw ng mundo at iba pang mga elemento sa kalawakan, dumaandaan na ang araw sa 13 konstelasyon at kabilang dito ang Ophiuchus. Kung dati-rating kasama ang Planetang Pluto sa solar system at ngayon ay hindi na, hindi na din iyon nakapagtataka sa mga pagbabago pa.

Tayong mga Pilipino ay aliw na aliw sa mga pang-uuto ng mga Astronomer at mga manghuhula. Dito sa bahay, kapag nagsasalita na si Zenaida Seba para basahin ang kapalaran o horoscope, siguradong hihinto sa mga ginagawa ang mga kapatid at nanay ko. Lalakasan ang volume ng TV upang malinaw na mapakinggan ang kapalaran, kasabay din nyon ang pang-aalaska ko. Tipong ganito yun:

Aries: magiging madilim ang iyong kapalaran na may kasamang pagkulog at pagkidlat sa umaga't hapon.

Taurus: matatae ka, magbaon ng maraming tissue.

Gemini: Mag-ingat, maghihiwalay na daw ang kambal sa iyong zodiac.

Cancer: Government Warning, Cigarette smoking is dangerous to your health. Nakaka-cancer.

Leo: Huwag magpalinlang sa mga mapagpanggap na Leo, hindi yan mga macho. Mga tiger yan, mga bading.

Virgo: Mawawala ka sa uso, lahat hindi na virgo, hindi na virgin.

Libra: Masasampal mo ang magtatanong sayo ng zodiac sign mo. Ang tanong nyang "Libra ka?" ay mapagkakamali mong "May bra ka?"

Scorpio: Uminom ng maraming tubig. Wala nyan sa disyerto.

Sagittarius: Mawawala na ang zodiac sign mo, ipapalit na sya kay kupido.

Capricorn: Mag-ingat sa pagkain ng mga berdeng pagkain, hindi lahat masustansya. Dahan-dahan sa pagkain ng lumot.

Aquarius: May nakaantabay na magandang kapalaran sayo kung sa Maynilad ka magtratrabaho.

Pisces: Wala kang kapalaran, matulog ka na lang.

Hindi naman sa hindi ako naniniwala sa horospocs este horoscopes na yan, hindi ko lang kasi matanggap na ang kapalaran ng bilyon-bilyong tao sa mundo ay 12 o 13 lang. Hindi ko kasi mapaniwalaan na ang mga  kulay at numero na binibigay nila ay maswerte nga talaga. Kung totoo yun, tataya na ako sa jueteng, ending, lotto, sakla, pekwa, bingo at color game sa mga peryahan.  Kung mangyaring totoo ang mga horoscopes, magkakaroon ng malaking problema sa ekonomiya, sa stock market.  Mamumulubi na ang PCSO at lahat ay magiging magaling sa arithmetic, astronomy, palmistry at color combination.

Noong ginawa ko ang akdang ukol sa Global Warming, sinabi ko na posibleng cycle lamang ang lahat.  Na ang global warming ay posibleng walang kinalaman sa mga aktibidad ng tao at ito ay isang "natural phenomenon" lamang. Mga panyayaring hindi kayang kontrolin ng tao. Kung ganun, posible na ang mga nararanasan natin pagbabago ngayon sa mundo ay epekto ng natural na galaw ng mundo at ng mga elemento sa kalawakan. Ang pagdaan ng araw sa ika-13 konstelasyon, ang pagkawala ng pluto sa solar system, ang pagbabago ng galaw ng mundo ay ang mga posibleng dahilan ng iba't ibang pagbabago na nararanasan natin ngayon.  Ilan lamang dito ang patuloy na pag-ulan sa ilang parte ng Pilipinas, pag-baha sa ibang bansa dulot ng malakas na ulan, labis na init sa ilang mga lugar na noon man ay hindi pa nakakaranas ng ganoong sistema.  Nakakatakot, nakaka-alarma (lalo na sa mga naniniwala sa 2012). Pero alam mo ba ang kahihinatnan ng lahat na mga panyayaring ito? Hindi.

Sa totoo lang, hindi ko din naman talaga alam kung ano ang hinaharap.  Walang nakakaalam nun, kahit ang mga tala sa kalawakan, hindi nila masasabi kung ano ang ating magiging kapalaran.  Katulad nga ng laging sinasabi ni Zenaida Seba, "hindi hawak ng mga bituin ang ating mga kapalaran, gabay lamang sila, meron tayong free will, gamitin natin ito."