...Makulay na Paglalaro ng mga Salita...

Ang sabi nila may iba't ibang kulay daw ang kombinasyon at paglalaro ng salita. Nakabatay daw iyon sa kung anong emosyon ang maaaring mabuo natin dito. Pula ang kulay kung galit o pag-ibig ang tinetema ng bawat kataga. Asul naman ang kulay kung ang mga salita ay nagpapahayag ng kalungkutan o kapayapaan. Puti naman daw kung ito ay tumutukoy sa kalinisan at kabanalan. Pero sa totoo lang, ako lang ang may sabi nun. Ahahaha...:)

Pero sa seryosong dahilan posible ngang magkaroon ng kulay ang bawat katagang namumutawi sa ating mga labi. Maaaring ang maging kulay nito ay itim sa tuwing tayo ay nagpapahayag na kamatayan o kasamaan. Sa kabilang banda, kulay berde naman para sa salitang may bahid kapilyuhan. At sa lahat ng mga kulay sa paglalaro ng salita, ang kulay berde (hindi luntian, positibo kasi ang dating sa akin ng kulay na lutian) ang pinakamasaya sa paglalaro ng mga salita. Bagamat hindi palasak ang paglalarawan ng mga salita sa medyo may kaselanang usapan, ang kulay berdeng paglalaro ng mga salita ay nag-iiwan ng kiliti sa ating imahinasyon. Sa madaling salita, berdeng kalokohan, berdeng kwentuhan, berdeng usapan.

Ang mga kabataang lalaki kapag nagkumpulan at masaya ang usapan, malamang sa malamang na berde ang kwentuhan. Posible na pinagtatawan nila ang pakikipagsapalaran ni Boy Bastos (Kilala nyo ba yun?) o di kaya naman ay posibleng pinagtatawan nila ang supot sa kanila. Pero sa totoo lang mahina talaga ako sa berdeng kwentuhan (Maniwala ka! Ayaw mo, e di wag..ahahaha). Medyo nahihirapan akong magbahagi ng mga kwentong may kaunting kapilyuhan sa kadahilanang laki ako sa simbahan (Maniwala ka na, sige na!).

Ang kabataang pinoy ay likas ang kapilyuhan. Kung berdeng usapan lang, hindi yan palalamang. Hindi ba noong nasa hayskul ka, sa H.E. class mo, ang salitang "Ketchup" ay dinadagdagan mo ng titik "a" sa dulo? Bukod dun, pilit mo din binubura ang letrang "r" sa salitang "pepper". Pati ang lagayan ng susi na may nakasulat na "Susi" ay pilit na binabago ang hulihang titik upang maging "o". Hindi pa dyan kasali ang pagpuno mo ng mga kahalayang salita na kadalasan ay may larawan pa sa palikuran ng mga kalalakihan. Makulay na paglalaro ng mga salita.

Sa musika, naabutan mo pa ba ang album na "Haring Solomon" ni Boy Sullivan? Ako? Syempre hindi na. Masyado ng antigo ang kantang ito. Pero muling binalik ni Andrew E. ang ilan sa mga kantang nakapaloob dito at isa dito ang "Pink Palaka". Ganito nila nilaro ang salita:

Sa silong ni kaka (aha, aha)

May taong nakadapa (nakadapa)

Kaya pala nakadapa (why, why)

Naninilip ng palaka (ay sus!)

Palakang may buhok (me buhok?)

Ngipin ay nakalubog (nakalubog?)

Ang kulay nito'y itim (itim yo!)

Hindi naman sunog...aha, aha

Mahusay maglaro ng salita si Andrew E. bagama't ang ilan ay may kapilyuhan sigurado naman ako na napangiti nito ang ilan. Sino naman kaya ang makakalimot sa dakilang pagkakalikha ni Andrew E. sa kantang Binibi Rocha. Mahusay. Makulay na paglalaro ng mga salita.

At kung berdeng kulay na paglalaro ng salita ang usapan, babanggitin ko na din ang husay ng aking paboritong Grin Department sa pagkakalikha nila sa kantang "Sion" na may mga salitang:

Kikinis at kikinis at kikinis 'yon, lagyan mo ng biton

Titibay ng titibay 'yon, lagyan mo ng takong

Kikinis at kikinis 'yon, lagyan mo ng biton

Titibay ng titibay 'yon, titibay yon

At kikinis pa 'yon

Makulay na paglalaro ng mga salita.

Noong bata pa tayo, pamilyar tayo sa kantang pambata na:

Bubuka ang bulaklak, papasok ang reyna

Sasayaw ng Cha-Cha, ang saya-saya

Boom-ti-ya-ya, boom-ti-ya-ya, boom-ye-ye

Boom-ti-ya-ya, boom-ti-ya-ya, boom-ye-ye

Kasabay din nito ang pang-asar na kantang, "1-2-3 asawa ni Marie, araw-gabi walang panty". At pagkatapos nun, may mantra pa tayong natutunan, ito yung "ang na ang na sulapukan sumaskitot mo ko mo ko". Noon hindi ko alam talaga kung ano ang ibig sabihin nyan, gusto mong malaman? wag na lang baka ma-ban pa ang blog kong ito. Ahahaha. Makulay na paglalaro ng mga salita.

May kaklase ako noon sa kolehiyo, si Poklong (guro na sya ngayon) na may kalokohan, kapilyuhan. Ugali nyang pagkwentuhan namin ang pakikipagsapalaran ni Boy Bastos. Minsan kapag walang propesor na dumating, tumatayo sya sa gitna ng klase habang malinaw na binabasa ang kwento sa Xerex Xeviera. Loud and Clear. Ang mga kaklase kong babae na imbes mainis o mandiri, katulad namin mga kalalakihan ay aliw na aliw din sa kalokohan ni Poklong. Masaya din kaming nakikinig sa mga green jokes nya. Ibabahagi ko sa inyo ang isa sa mga kwentong iyon na hindi ko din alam kung saan nya napulot:

Eksena: Si Ms. Pruke ay isang guro sa hayskul. 1st day of school...kaya syempre mag papakilala si titser.

Ms. Pruke: ok class! (sinulat ang pangalan nya sa blakbord) My name is "Miss Pruke" with an R with an R with an R! (with a stress habang sinasabi nya ung with an R) mukhang terror si titser... pigil ang pagtawa ng mga estudyante dahil baka mapagalitan sila.

Ms. Pruke: Ok class kelangan bukas pag tinawag ko kayo alam nyong banggitin ang pangalan ko ha?

Kinabukasan.

Tinandaan ng buong klase ang "With an R" maliban kay Dan dahil sa palagian nyang pagde-daydreaming

Ms. Pruke: Anong pangalan ko? (naghanap ng tatawagin at nakita nyang si Dan ay lumilipad ang isip)

Titser: Dan anong pangalan ko? . . .

Dan: a eh!? . . . (sabay sabay ang buong klase sa pagbulong ng clue) with an R WITH AN R!

Dan: Ah! ang pangalan nyo po ay Miss Prekprek!

Ahehehe....Makulay na paglalaro ng mga salita.

Kapag narinig nyo ang mga pagkaing hotdog, talong, itlog, mani, pakwan, tahong, tilapia, malamang sa malamang na hindi ang mga literal na pagkaing yan ang naiisip mo hindi ba? Berde. Ahahaha! Parang katulad nito ang titulo ng mga palabas noon, "Patikim ng Pinya", "Pining Garcia". Isama ko na din ang mga titulo sa kwento ni Eros Atalia tulad ng, "Inararo mo ang Bukid ko", "Laway sa Monay", at "Luha sa Dulo ng Batuta". Ahahaha. Makulay na paglalaro ng mga salita.

Sa mga libangan naman tulad ng Bingo, siguro ako na alam mo ang numerong binangit kapag sumigaw ang taga-bola ng "Sa B, Tirik na Tirik sa Tanghaling Tapat" o kaya naman sa "Sa O, paborito nyo.. baligtaran". Makulay na paglalaro ng mga salita.

Noong bata pa ako, kapag hinahanap ko ang tatay ko sa nanay ko at sinabi ng nanay ko na "nandun, naghahalo at sumasalat ng tahong", alam na alam ko na nag-lalaro ng mahjong ang tatay ko. Pero ngayon sa tuwing maiisip ko ang linyang iyon, napapangiti talaga ako. Makulay na paglalaro ng mga salita.

Kahapon. Sabi ng nanay ko, wag ko daw ugaliing magbabad sa bentilador (electric fan) dahil maaring manigas ang aking mga kalamnan o maging ang mga binti at paa. Sumabat si Erik (bayaw), "Yet, wag mong ibabad sa chever mo ang electric fan, maninigas yan...ahahaha".  Ngumiti lang ako, hindi masyadong tumawa, pero sa isip ko humahalakhak na ako, "Siguradong maninigas ito, lalo na sa madaling araw. Kusa!"   Makulay na paglalaro ng mga salita.