Facebook (Pesbuk)

5:00am...maingay na naman ang alarm clock ko. Kinapa, ang kinaroonan, in-off ang alarm switch, kinuha, tinignan ng matang hirap sa pagdilat. Nakipagtitigan sa orasan. Pupungas-pungas. Tinangkang ibato dahil nagulantang sa kasarapan ng tulog.  Pero wag na lang, mahirap maglinis ng nakakalat na bubog. Kinuha ko ang selpon (cellphone, mobile phone, handphone???), nagsimulang tumipa. Message Sent! 

Tumayo na din ako, umunat ng bahagya. Nagdasal ng pasasalamat at nagsimula ng iligpit ang pinaghigaan. Pagkayari ng ilang saglit, hinanap ang saksakan ng battery backup. Pindot dito, pindot doon. On, on, on! Pinagpahinga ko na din ang bentilador na nagpasarap sa aking pagtulog.  Diretso sa kusina. Kumuha ng baso, nilagyan ng isang kutsaritang kape at asukal, at madaming coffeemate. Nagpakulo ng tubig.  Hintay ng ilang saglit. Binuhos ang kumukulong tubig sa baso. Wag kayong maniwala sa kasabihang nawawala ang aroma ng kape kapag binuhusan ito ng kumukulong tubig. Kaya nga kape dapat mainit.  Matagal akong magkape kaya dapat tumagal din ang init nito.  Oops, o ito may cinnamon pa.  Hindi yan yung commercial na "Gawin mong timpla nya". Talagang may cinnamon powder ako. Ganyan kaming mga peti-burgis, may kaunting kayabangan minsan sinungaling din katulad nating lahat na may facebook.

Pandalas ang pasok ko ulit sa kwarto. Sinipat kung nakabukas na ang computer. Bitbit ang isang tasang kape, umupo ako sa tapat ng monitor. Patong ang kamay sa mouse. Firefox, click. Sa keyboard naman, tipa-tipa-tipa. Facebook.com, enter! Tipa ulit, email, password, enter!

Isa sa pinakadakilang likha ni panginoong Mark Zuckerberg ang facebook.  Sa katunayan, kaunting panahon  na lang ay mapapantayan na nito o mahihigitan pa ang mga nangungunang relihiyon sa buong mundo kung bilang ng miyembro ang pag-uusapan. Base na din sa istatistika ngayong 2011, umaatikabong pitong daan at limampung milyon (750 million) ang bilang ng kanilang mga aktibong miyembro. Mga aktibo lang yun, paano pa ang bilang na mga hindi aktibo? Ang malupit nyan kailan lang ba nabuo ang facebook kumpara sa mga reliyon na daan o libong taon na ang nakalilipas buhat ng ito ay nalikha? Kaya nga hindi na din nakakapagtaka na kung isang araw ay maging religion na ang facebook. Sa panahong yun magkakaroon na ng rebulto si panginoong Mark Zuckerberg.  Magkakaroon na ng pagsamba tuwing alas-sais ng gabi kaya dapat ang lahat ay online.  Prayer request online.  Donations via paypal.  Magkakaroon na din ng worship song na ang title ay "You like it, I like it". Like like like!

Kung hindi ako nagkakamali, taong dalawang libo't apat (2004) nang simulang gawin ni panginoong Mark Zuckerberg ang facebook. Noong mga panahong iyon, isa lamang siyang magbobote sa Amerika. At dahil sa kanyang sipag at tyaga nakupulot siya ng magic bote. Kiniskis niya iyon hanggang sa lumabas ang genie.  Binigyan siya ng genie ng tatlong kahilingan dahil sa ginawa niyang pagpapalaya dito. Batay sa mga talang nakasulat, hindi na nabanggit ang iba pang kahilingan ng panginoong Mark Zuckerberg, pero humiling siya na maging pinuno ng sanlibutan at iyon ay natupad sa pamamagitan ng facebook.  Pero syempre hindi totoo yang sinasabi ko, gawa-gawa ko lang yan, obvious naman eh. Nahirapan din kasi akong ipaliwanag ang mga pangyayari sa pelikulang "The Social Network (2010)" kahit na sabihing tatlong beses ko na itong napanood.  Sa pelikulang yan nakadetalye ang mga pangyayari sa pagkakalikha ng facebook.com. Doon makikilala ninyo sina Eduardo Saverin, ang mga maangas na Winklevoss (kambal yun kaya Winklevi ang tawag ni panginoong Mark Zuckerberg), yung ex ng panginoong Mark Zuckerberg na si Erica Albright (ang sabi sa chismis hindi daw yun ang totoong pangalan para maprotektahan ang tunay na pagkakakilanlan), at syempre nandun din si Justin Timberlake este si Sean Parker na nagsilbing mentor kuno ni panginoong Mark Zuckerberg .

Sa Pilipinas, ang facebook ang nangungunang website na binibisita ng Pinoy. Tinalo na nito ang henyong si Google. Humahabol na din sa listahan ang isa pang henyo na si Wikipedia.com.  Itanong mo lang sa kanila, siguradong alam na nila ang sagot. Baka nga pati ang kapalaran mo ay alam na din nila. Close kasi sila kay panginoong Mark Zuckerberg.  Kung iisipin apektado na ang buong mundo sa paglobo at paglawak ng mga kumpanyang ito.  Halimbawa, ang google ilang milyong negosyate ba ang nakadepende sa google ads? Ilang blogger ba ang umaasa sa traffic na nagmumula sa google at facebook? Ilang blogger ba ang aasa sa kakarampot na kita mula sa google adsense (malas deactivated ako, taeng invalid clicks)? Ilang pilipinong estudyante ba ang aasa sa dali ng pagre-research sa tulong ng mga henyong si Google at Wikipedia kaysa umasa sa sobrang bising si Kuya Kim ng "MutaingLawin"?  Sa lawak ng koneksyon ng nabuo ng mga kumpanyang ito, posibleng nasa palad na nga nila ang mundo, pagulong-gulungin, paikutin at saka ibato. Caidic Three Points!

Profile Page. Wow ang pogi ko, may kandong pang-chick. Ay misis ko pala yan. Ito ang maganda sa facebook, payabangan.  Aba, syempre sa page mo dapat ikaw ang bida kaya dapat maganda ang lahat ng nakikita ng mata. Nakakatuwang isipin lang na sa sobrang galing ng facebook kaya nitong bumuo at sumira ng relasyon. Ilang pagkakataon na ba na ng dahil sa facebook ay nakatagpo ang ilan ng kanilang pag-ibig o di kaya's natagpuang muli ang nawalang pag-ibig? Ilang pagkakataon na din ba ang pagkakataon na nabisto ang kabalbalan ng mister ng dahil sa facebook? Totoo maganda ang facebook. Connecting People. Ay slogan pala yan ng Nokia. Sa facebook, pwedeng ang tagline ay "Connecting and Disconnecting People". Oha! 

Sa facebook lahat ng tao kaibigan mo, kahit na yung iba ay kaaway mo naman. Sabi nga, "friend request accepted", pwede kayang "enemy request accepted" o kaya naman "friend request ignored"?. Yung iba naman magpo-post ng ganito "My father passed away last night" (grammar check off).  Tapos makikita mo 20 people like this. May hirit pang "like this comment".  Huwat?! Mantakin ba naman namatay na nga nagustuhan pa ng dalawampung tao. O kaya naman mag-post ka na "Feeling alone and lonely" (grammar check off ulit), makikita mo may magla-like talaga. Nasaan na kaya ang dislike button? Sa palagay ko, ayaw pang gawin ni panginoong Mark Zugerberg yun. Bakit? Negatibo daw kasi ang dislike or yung enemy request. Dapat perfect world ang facebook, langit kumbaga kaya dapat lahat maganda. Sa sobrang ganda kadalasan kasinungalingan na. Sa facebook, ang taong sinungaling ay lalong nagiging sinungaling. Friends daw, magkaaway yan.  Sa profile page, ang ganda ng mukha, ang kinis, ang klasik dito adobe photoshop lang pala (tunog radio station, ahahaha!). Halos lahat ng babae sa facebook, lahat yan ay mga model, camwhore sabi nga nila. Kunyari stolen shot, tapos naka-make-up. Oh come on!  Sa mga kabataan naman, makikita mo galit yan sa kapwa nila maarte mag-pose sa picture. Tapos parinigan yan ng status (naririnig ba ang status? nababasa siguro). Haters complain about haters. Ang malupit nyan yung iba kunyari mayaman pero pulubi din naman. Mas epektibo din ang facebook kumpara sa mga gym.  Yung mga buto't balat (lumilipad???)  nagkakaroon ng curves at yung mga bondat at lumba-lumba, nagagawang makapagbawas ng timbang sa profile picture. Salamat Saint Adobe Photoshop. Akalain mo yun, hindi mo na kailangan sina Calayan at mareng Vicky Belo para sumeksi, kay St. Adobe Photoshop ka lang ligtas na ang umaalwas na bilbil mo. 

Relationship Status. Sa facebook nakakatuwa din ito. Yung mga single, yung iba dyan ay hindi talaga single, yung iba double, yung iba pa nga triple or yung malupit ay multiple.  Yung iba naman kunyari Engage, pero hindi naman, yung iba kasi dun kung hindi confused or MU (mag-un), yung iba nagpapantasya lang. It's complicted. Anong relationship status ito? Dapat sabihin din ang reason bakit complicated. Halimbawa, waiting, broken hearted but searching, in love all by my self, bitter, assuming, home wrecker, martyr, kabit or forever alone.  Ei yung mga pari at madre anong relationship status nila? In relationship with God? Pwede siguro. Pero mas maganda kung  In MUTUAL relationship with God. Ayan sacred kasi yun.

Games.  Isa din ito sa nagpatibay ng organisayon ng facebook. Simula sa farmville, pet society, mafia wars, at plants vs. zombies. "The zombies ate your brain". Angry Birds sa facebook?  Hindi ko pa na-try yan. Mahusay si panginoong Mark Zuckerberg hindi ba? Alam niya kung ano ang kiliti mo. Alam niya kung ano ang hinahanap-hanap mo. Alam niya kung ano ang gusto mo. Baka nga maging diyos na siya.

Oops. Logout!

[Note: Pasensya na kung may kahabaan, ang gusto ko lang naman ay makapagbigay ng kaalaman at kaunting kasiyahan, salamat sa hindi pag-skip read...:)]